一個毫無聖誕氣氛嘅聖誕，不過或者咁反而比較輕鬆無負擔。今年都只係挖咗50蚊同三家姐夾份買禮物比姨甥，都無買嘢比其他人，而其他人亦一樣好省。禮物係收到一件，不過唔係我杯茶。覺得有種老氣之感……覺得聖誕樹、聖誕佈置、聖誕咭、聖誕party係年輕人專利，所以我已經無份，當然缺錢同無朋友亦係重要因素。

GE好快又玩到悶悶哋，於是走去寫小說。字數已經過一萬，對白好多、好多、好多……不過用旁白會更加惡頂。今次少見地，哩篇文同之前嘅章回有某些關連。好似再次登場嘅雪琳同亞爾曼、略略重提過森普斯點樣認識佢哋、提到協會、提到森普斯回想起法拉路，唔似以前嘅章回咁獨立。

今年買比自己嘅聖誕禮物係《追尋歐洲小販的歷史旅程》：

原本想買張華義點卡，換10個安德列箱子幫角色裝裝身。不過我上官網同上巴哈，都係搞唔清楚安德列箱子會開出咩嘢。加上買華義點卡又麻煩，喺街上猶疑之時入咗書店，結果就變咗買書。另，GE商城嘅嘢真係貴到嘔血=_=|||除咗安箱同克箱，其他嘢我完全唔考慮會買。

今日狙擊手都升到80lv，狙擊手換咗80等開拓大衣、80等開拓長槍，而斥候都換咗80等開拓皮甲。84進化唔洗諗，因為實在勁貴。

剛開始睇《噬血聖母的噤聲曲》，不過我相信我好快就會放棄睇落去。哩本書啲句式好怪，唔知係翻譯問題，定係佢原著就係咁嘅鬼樣。喺第七頁有一句好經典，一句句子32個字。不過論到難明難讀，都係第九頁嘅比強——「就算這個房間不像你腦中浮現一位將一生都奉獻給警界的員警時」，就算我打埋下面嘅幾句句子上嚟，都唔見得會變得比較好了解。都唔明點解咁嘅文句都可以過到骨，出版社到底喺度搞咩？九角文化事業有限公司……之前未聽過。

入得返GE，不過今次聖誕活動真係唔係幾好玩，只係算好過無咁解。衣家斥候79LV、小貝78LV、狙擊手77LV，喺肯扎慢吞吞咁UP LV。打算小貝升80LV時換80等開拓散彈比佢，用嚟帶小隻用。

小說方面，《亡者殿堂》計劃得唔夠周密，所以好多地方都要修改。原本雪琳今次唔會出場，不過因為種種問題，需要叫返佢出嚟幫忙處理處理。而哩個故事完咗之後，就會係「協會」嘅事，然後或者就會講到雪黛……不過佢嘅事我仲未安排好晒。